nýtt örorkulífeyriskerfi og fjármögnun kjarasamninga.

Hæstv. forseti. Ég þakka aftur hv. þingmanni fyrirspurnina. Ég tel ekki að öryrkjar séu of sælir af kjörum sínum, enda hef ég barist fyrir því að það hafi komið hækkanir til öryrkja á meðan ég hef setið í stóli félags- og vinnumarkaðsráðherra. Það hefur gerst í minni ráðherratíð og ég held að þær breytingar sem ég hef mælt fyrir á Alþingi og eru núna til umfjöllunar í hv. velferðarnefnd beri þess líka skýrt merki. Ég vonast innilega til þess að við munum hér á Alþingi geta sameinast um þær breytingar sem ég tel að verði mjög til góða og, líkt og hv. þingmaður réttilega nefndi, muni hjálpa til við að draga fólk sem er í sárri fátækt í þessum hópi a.m.k. eitthvað áfram í rétta átt. Svo er það auðvitað sameiginlegt hagsmunamál okkar allra hér inni sem viljum jafnari hag í landinu að við höldum áfram að bæta hag þessa viðkvæma hóps. Og ég veit að hv. þingmaður stendur með mér í þeirri baráttu.