svæðisbundin flutningsjöfnun.

Virðulegur forseti. Styrkirnir skiptast þannig, þetta eru bara upplýsingar úr skýrslunni og hv. þingmaður getur eins og aðrir hérna dýpkað þekkingu sína enn frekar ef hann vill, að um 46% umsókna koma frá Norðurlandi eystra, 20% af Vestfjörðum og önnur svæði eru með 10% eða minna. Framlögin eru vissulega ekki nema 60% af framreiknuðu framlagi frá árinu 2013 og væri auðvitað ágætt að hækka þau. En ég veit að hv. þingmaður á sæti í fjárlaganefnd og gerir sér þar af leiðandi mjög vel grein fyrir því að á þeim tímum sem við búum við í dag, í verðbólgu, er jú mikilvægt að halda frekar aftur af aukningu fjármuna í fjárlögum en ella því að stærsta verkefnið er að ná niður verðbólgunni og vöxtunum. Það myndi örugglega gagnast þessum fyrirtækjum enn betur en að bæta í alla peninga sem ríkið sendir út.

Að öðru leyti vil ég bara segja að kerfið og ferlið er í sjálfu sér mjög einfalt. Auðvitað má alltaf gera betur og er sjálfsagt að skoða það ef hv. þingmaður er með góðar hugmyndir og ábendingar um það.